Superman
Eftir Ragnhildi Björt Björnsdóttur
Nihilískur veruleikinn blasir við mér.
Í 40 daga ráfa ég um í tóminu og finn lífsmáttinn veikjast með hverju spori
þegar hann mætir mér.
Í bláum heilgalla,
með kross á brjóstinu,
svart hár
og vöðva á við flóðhest
Og hann tekur utan um mig
og segir mér að þetta verði allt í lagi,
leggur mig niður á skýin
reyrir hendur mínar við þau,
lokar hurðinni og felur lykilinn.
Hann kemur til mín þrisvar á dag með lífskraftinn
og sannfærir mig um að þetta sé mér fyrir bestu.
Og ég trúi honum.
Minn eiginn Superman.
[hr gap=”30″]
Ragnhildur Björt Björnsdóttir (f. 2002) er nemandi við MH og nýbökuð kattamóðir úr Laugardalnum sem dreymir um að verða næsta Vera Illugadóttir. Hún hefur verið að skrifa fyrir alvöru frá því að hún var 16 ára og hefur fengið birt eftir sig ljóð í t.d. Tímariti máls og menningar og Skandala. Fyrir utan að semja ljóð eyðir hún tímanum í að velta fyrir stóru spurningunum, eins og til dæmis hvað hún eigi að elda á þriðjudaginn. Þess ber að geta að Ragnhildur er konan á myndinni, ekki kötturinn.
