Fyrir tæpum tíu árum kynntumst við fjölskyldan Fróða sóða fyrst. Hann kom á heimilið í myndabók, þar sem Fróði sleikir hunda, pissar í blómabeð, borar í nefið og BORÐAR horið (hér þurfti alltaf að hrylla sig ægilega yfir ógeðinu). Í bókinni er endurtekningin áberandi, þar sem fjölskylda hans hrópar reglulega á hann „oj  bara, Fróði sóði“. Og það var sama hve oft við mæðginin lásum bókina saman, hún sló alltaf í gegn. Það var því svolítið gaman að sjá að Fróði sóði er kominn út í léttlestrarbókum eftir Alan MacDonald, það er Fróði sóði – Bók 1 og Fróði sóði – Bók 2

Líkindi milli pörupilta

Bókin er á nokkuð hefðbundnu léttlestrarformi. Stafirnir eru þægilega stórir, langt bil á milli lína og blaðsíðurnar ekki alveg hvítar. Í hvorri bók fyrir sig eru þrjár sögur af Fróða og hans uppátækjum. Að vissu leyti minnir Fróði svolítið á Skúla skelfi eftir Francescu Simon, sem er kannski ekki skrýtið þar sem Alan MacDonald hefur unnið að gerð sjónvarpsþáttanna um Skúla skelfi.

MacDonald fylgir því nokkkuð öruggri formúlu í bókunum. Fróði er uppátækjasamur drengur sem skeytir lítið um reglurnar. Hann hefur undarleg áhugamál, eins og að búa til fýlubombur, safna ormum og hann er undarlega heillaður af ruslabílnum. Fróði er sem sagt drengurinn sem veldur uppþoti í skólastofunni og foreldarnir eiga fullt í fangi með – mjög svipað Skúla skelfi. Á móti Fróða er telft vitringi bekkjarins, sem er drambsamur besserwisser.

Líklegar til vinsælda

Sögurnar vekja áhuga markhópsins á lestri. Minnugur fyrri kynna okkar af Fróða var þriðjubekkingurinn fljótur að grípa bækurnar og lesa þær upp til agna. Hann gaf þeim góða einkunn, hló reglulega hátt og innilega yfir uppátækjum Fróða og endursagði heilu sögurnar.

Til að draga þetta saman í nokkrar setningar: Léttlestrarbækurnar um Fróða sóða fylgja öruggri formúlu sem er vel til þess fallin að draga börn inn í lesturinn. Þrjár sögur í einni bók skiptir bókinni upp í þrjá þægilega bita sem auðvelt er að gleypa í sig. Bækurnar henta einstaklega vel börnum sem eru nokkuð örugg í lestri, en vilja auka lestrarhraða. Þær eru líka fínar fyrir foreldra að ota að börnum sínum til að vekja lestraráhuga.

Lestu þetta næst

Barnið er svangt

Barnið er svangt

Sól_Ey, Lokaverk af sviðshöfundabraut við LHÍ eftir Egil Andrason. Stofa L220 er lítil og...

Höfugur ilmur

Höfugur ilmur

Meðan leikhúsgestir streyma inn í Kassann í Þjóðleikhúsinu stendur Unnur Ösp bakvið örþunnt og...

Tíminn teygir úr sér

Tíminn teygir úr sér

X eftir Alistair McDowall Klukkan er 20:07 og Ray er að fá sér að borða. Gilda orðar áhyggjur...

Hægt og hljótt

Hægt og hljótt

Hvítalogn er fimmtánda skáldsaga Ragnars Jónassonar og önnur bókin í þríleiknum um lögreglumanninn...