Elísabet Jökulsdóttir hefur sent frá sér nýja skáldsögu, það er nóvellan eða stutta skáldsagan Límonaði frá Díafani. Í henni fer Elísabet yfir æskuár sín og þá nánar tiltekið ákveðna ferð til Grikklands sem hún fór í átta ára gömul með foreldrum sínum og systkinum. Það mætti segja að verkið sé partur af fjölskylduseríu Elísabetar en hún hefur auðvitað mikið verið að vinna með eigin reynslu og fjölskyldusögu í verkum sínum. Verkin Aprílsólarkuldi og Saknaðarilmur vöktu til að mynda mikla athygli þegar þau komu út en í Aprílsólarkulda fer hún yfir sambandið við föður sinn og í Saknaðarilmi tengslin við móður sína.
Smáskoðun á virkni minninga
Í Límonaði frá Díafani er fókusinn aftur á pabba hennar að ákveðnu leyti, en hér er hún meira í endurliti og skoðun á tilfinningum barnæskunnar. Minningar og virkni þeirra er einnig í brennidepli, hvernig við munum hluti og atburði stopult og jafnvel einungis með lyktar- eða bragðskyninu, hvernig sumar minningar magnast upp á meðan aðrar hverfa, og hvernig sumt sé betra í minningunni en það er síðan í núinu.
Barnsleg augu
Óvíst er hversu lengi fjölskyldan dvelst í Grikklandi en þetta virðist hafa verið lengri tími en sumarferðalag. Ella Stína, aðalpersónan og sögumaður, talar um að hafa farið þarna í skóla og þau flakka einnig um eyjurnar. Elísabet flakkar líka um minningarnar í verkinu og þær varpa ákveðinni hlýju, en gríska sólin gægist líka reglulega í gegnum textann. Auðvitað er munur síðan á hvort að lesendur þekki fyrri verk og sögu Elísabetar við lestri á þessari bók. Þeir lesendur sem koma inn í Díafani með fyrri verk í bakpokanum lesa þessa tilteknu sögu með öðrum brag en þeir sem renna í hana blint. Sagan hoppar til og frá eins og minningarnar – og barnslegu augun sjá á meðan hið fullorðna skáld skilur en syrgir horfin andlit.
Elísabet sér og spáir í tilverunni með svo skemmtilegum augum og það sést vel í þessari stuttu en meitluðu sögu. Smáatriði hversdagsins lifna við í fórum Elísabetar og springa út í merkingarbærari myndir. Lýsingar á tilfinningum ná inn að hjarta og hún er einkar lúnkinn við að byggja upp andrúmsloft í fáum orðum.
