Í fyrra lásum ég og drengurinn minn bókina Tannburstunardagurinn mikli og vorum hæstánægð. Næsta bók í seríunni er Búningadagurinn mikli og hún er ekki síður skemmtileg. Það kom því ekki annað til greina en að lesa nýjustu bókina um fyndnu dýrin í dýragarðinum hans Alfreðs Uggasonar.
Höfundur bókanna er Sophie Schoenwald. Hún er menntuð sem sérfræðingur í mannlegum samskiptum og býr í Köln. Gunther Jakobs myndlýsir bókunum. Hann hefur bæði myndlýst fjölda bóka og sjálfur skrifað fyrir börn. Ásta Halldóra Ólafsdóttir þýddi bókina yfir á íslensku.
Svefnleysi getur verið bugandi
Þegar Bogi Pétur broddgöltur er alveg að sofna heyrir hann undarleg hljóð berast um dýragarðinn. Hann kannar málið og þá kemur í ljós að einn fíllinn hefur gengið í svefni. Það er þó aðeins byrjunin á vandamálum aumingja Boga Péturs þessa nóttina. Mörg dýranna í garðinum upplifa allskonar svefnvandamál sem broddgölturinn eyðir nóttinni í að leysa. Sum þessara vandamála eru mjög skondin, eins og letidýrið sem slappaði svo mikið af yfir daginn aðþað getur alls ekki sofnað yfir nóttina. Á endanum skríður Bogi Pétur upp í rúm, úrvinda eftir allt næturbröltið.
Staldra við og útskýra orð
Bókin var fyrst gefin út í Þýskalandi árið 2020. Þýðingin er vönduð og flæðir vel. Orðaforðinn er almennt einfaldur en inn á milli eru flóknari orð sem bjóða upp á gullið tækifæri til að staldra við og útskýra fyrir krökkum. Líkt og fyrri bækur er þessi prentuð í passlega stóru broti svo myndirnar fá vel að njóta sín. Myndlýsing Gunthers er bráðskemmtileg og gerir það að verkum að persónurnar lifna við á svo fallegan hátt á blaðsíðunum.
Hugljúf og róleg
Næturbröltið mikla er tilvalin bók fyrir kvöldlesturinn. Sagan er hugljúf og vekur upp notalegar tilfinningar fyrir svefninn. Hún sýnir hversu mikla leikni og þolinmæði þarf þegar kemur að því að hjálpa einhverjum sem á erfitt með að sofna og þar tekst broddgeltinum Boga Pétri vel til.
