Þetta var bróðir minn… eða hans

Við vitum langflest að Vincent van Gogh er á meðal frægustu og áhrifamestu málurum sögunnar þótt að fólk viti ekki meira um myndlist en það. Ég hef dáðst af goðsögninni af honum frá því ég var lítið barn og geri enn. Ég les, horfi og skoða allt efni sem ég finn um líf hans, list og erfiðleika. Það kom auðvitað ekki annað til greina en að grípa nýju bókina úr hillunni á bókasafninu þegar ég sá hana!

Judith Perrignon skrifar söguna Þetta var bróðir minn… Í henni skapar hún átakanlega sögu manns sem misst hefur bróðir sinn, mann sem er svo harmi sleginn af sorg að hálfu ári seinna er hann látinn. Höfundurinn tekur fram að engar staðreyndir eru tilbúnar af henni, heldur styður hún sig við bréfaskriftir milli bræðranna og annarra vina og vandamanna, og fær að láni rödd og minningar Theos van Goghs til að segja okkur frá því hvernig hann berst fyrir að koma stjörnu bróður síns á himininn. Berst fyrir því að sanna fyrir fjölskyldu sinni að hann hafi skipt máli.

Ég hélt þegar ég tók bókina í hendur að hún myndi líklega ekki fræða mig um neitt sem ég vissi ekki nú þegar um Vincent, en mér skjátlaðist. Ég hafði af einhverri einfeldni staðið í þeirri trú að stjarna Vincents hefði rokið upp á himininn af sjálfsdáðum strax og hann lést en mikið hafði ég rangt fyrir mér. Á meðan Vincent lifði var hann virtur meðal listamanna í París og jafnvel spáð fyrir því að hann ætti eftir að hafa mikil áhrif á listheiminn. Og það sem fæstir hafa leitt hugann að er að það voru ekki bara ótamdir hæfileikar hans og skap sem gerðu hann að goðsögn, heldur var það trúr og tryggur bróðir. Bróðir sem gaf endalaust af sér því hann hafði svo mikla trú. Bróðir sem missti svo mikið og fórnaði heilsu, geði og loks lífinu til að segja heiminum að Vincent væri sannur listamaður.

Þótt að lesandinn viti lítið um listasögu eða um líf og list Vincents hugsa ég að honum geti fundist lesningin afskaplega áhugaverð. Þeir sem telja sig vita margt ættu alls ekki að sleppa því að lesa hana því það er neflilega stór munur á goðsögninni sem gerð hefur verið úr honum og manninum sem hann í raun var. Þetta er saga um Vincent sem bróður.

Hits: 104



'Þetta var bróðir minn… eða hans' has no comments

Be the first to comment this post!

Would you like to share your thoughts?

Your email address will not be published.

Lestrarklefinn[hjá]lestrarklefinn.is