IKEA (eða hugmyndir mínar um framhaldslíf)
ávextirnir í skálinni eru
úr frauðplasti
bækurnar í hillunum innantómir
kilir
tunglið á glugganum er klukka
útskorin úr sænskum rekavið –
hún tifar hærra en þotuhreyfill við
flugtak
sverð demóklesar sveiflast yfir
svefnsófanum
og samtímis í speglum á öllum
veggjum
(þeir stækka rýmið sjáðu til
gera það
óendanlegt)
ótrúlegt hve margir grafreitir
rúmast
á ekki fleiri fermetrum
[hr gap=“30″]
Kæruleysi
Áður en ballið var búið lágu tugir í valnum. Ótal aðrir voru sárir og byggingin var talin svo gott sem ónýt. Í þvögunni sem myndaðist hafði ýmislegt misjafnt átt sér stað. Menn höfðu farið frjálslega með staðreyndir, konur höfðu troðið börn sín undir, vímuefni verið höfð nokkuð frjálslega við höndina, nauðsynjavörur orðið ófáanlegar og gengið kaupum og sölum fyrir svimandi upphæðir á svartamarkaðnum, vafasamir menn höfðu ratað í valdastöður og framið glæpi svo hrikalega að þeir verða aldrei tilgreindir á prenti; feður höfðu seld dætur sínar í kynlífsþrælkun til hæstbjóðanda, ótal börn höfðu fæðst utan hjónabands, og lá grunur fyrir um að sum þeirra væru afsprengi sifjaspells. Þetta var bölvað kæruleysi sem olli, sagði yfirmaður rannsóknardeildar síðar á fréttamannafundi. Bölvað kæruleysi, en það var aldrei gefin út nein kæra.
[hr gap=“30″]
Ægir Þór (1988) er menntaður í heimspeki, sagnfræði og ritlist. Hann hefur gefið út sex ljóðabækur, ásamt því að birta ljóð, ljóðþýðingar og smásögur í Stínu, Ós pressunni, Skandala (sem hann ritstýrir) og Tímariti Máls & menningar. Í apríl kemur hún hans sjöunda bók, Ljóð að yfirlögðu ráði, en þar má finna eftirfarandi ljóð.
