Brot úr ljóðabókinni Úthverfablús
Eftir Sjöfn Hauksdóttur
1. maí
Skvísaður upp á nýjum sumardekkjum, umhverfisvænni en rétt áðan, þó tæplega, keyrir nettur fólksbíllinn niður ólétta konu og kolefnisjafnar þannig tilvist sína
Sumar
Það er ekki einu sinni sól
en henni var spáð fjandinn hafi það
og það er næstum 11 stiga hiti
svo við sitjum úti eins og pöddur
á ermalausum bolum og
með brett upp að hné
þvælum í okkur volgum bjór og niðurbrotnum pulsum
gnístum tönnum framan í blíðuna
og biðjum guðina sem reiddust okkur forðum um bleik nef og að hann
haldist þurr.
16. júní
Sumarið er komið
og rennur í stríðum rjómaístaumum niður fingur og andlit
ómálga barns í kerru
áður en það er snarlega þurrkað upp
með regnskýi, blótsyrðum
og einmana blautþurrku
í hendi olíuborinnar móður á leið á djammið.
[hr gap=“30″]
Sjöfn Hauksdottir er ljóðskáld, bókmenntafræðingur, listamaður og grimmur-bridge-spilari. Önnur ljóðabók hennar, Úthverfablús, kemur út í næstu viku hjá Kallíópu útgáfu. Útgáfuhóf bókarinnar verður haldið miðvikudagskvöldið 24. júní á Radisson 1919 kl. 19-21.
