Bókmenntahátíð í Reykjavík hefur verið haldin hátíðlega annað hvert ár í Reykjavík síðan árið 1985. Í ljósi heimsfaraldursins varð þó röskun á síðustu hátíð en hún fer nú fram dagana 8. – 11. september. Þessi hátíð er fundarstaður lesenda og höfunda og lifandi vettvangur umræðna um bókmenntir, skáldskap, þjóðfélagsleg málefni og ýmislegt fleira því bókmenntirnar snerta á mörgu og umfjöllunarefnin eru óteljandi.
Í samstarfi við Bókmenntahátíð í Reykjavík mun Lestrarklefinn fagna því að nú fari hátíðin loksins fram með því að beina kastljósinu að þeim höfundum sem taka þátt að þessu sinni. Höfundarnir eru íslenskir og erlendir og má þar nefna Alexander Dan, Sverri Norland, Bergþóru Snæbjörnsdóttur, hina frönsku Leilu Slimani sem er af marokkóskum ættum, hina finnsku Sofi Oksanen og hinn sýrlenska Khaled Khalifa.
Ókeypis er inn á viðburði og þeir eru öllum opnir, því hvetjum við bókaunnendur til að fara og njóta viðburðanna, en hér má kynna sér dagskrá hátíðarinnar.
