Haustið er gengið í garð með öllum sínum stormum, regni og litadýrð. Haustinu fylgir þó líka nýjir nemendur, nýjir lestrarhestar og þörf eftir góðum lista yfir léttlestrarbækur sem henta þessum nýju lesendum. Lestrarklefinn tekur því saman einn ágætis lista fyrir börn sem eru farin að lesa eitthvað, en vilja halda tryggð við vel myndlýstar bækur með stóru letri.

Bækurnar sem á eftir fara eru bækur sem eru auðveldar í lestri fyrir yngstu lesendurna, þá sem eru í 1.-4. bekk. Bókunum er raðað upp eftir erfiðleikastigi og því ætti að vera nokkuð auðvelt að vinna sig niður listann og á sama tíma þjálfast í lestri. Við vonum að sem flestir nýjir lesendur finni eitthvað við sitt hæfi.


BINNA B. BJARNA og Heyrðu Jónsi

Í bókunum fylgjast krakkarnir með Jónsa eða Binnu. Jónsi og Binna glíma við ýmis vandamál og erfiðleika í hverri bók. Erfiðleikarnir eru allt frá kvíða yfir í siðferðilegar spurningar eins og hvort það sé í lagi að segja ýkjusögur eða skröksögur. Með hverri bók er því hægt að taka með sér einhvern lærdóm.


Stjáni og stríðnispúkarnir

Í Sjána og stríðinispúkunum segir af Stjána – ungum dreng sem geymir í herbergi sínu forláta kommóðu. En kommóðan lyktar stundum illa. Það kemur í ljós að kommóðan inniheldur fimm litla púka – stríðnispúka. Stríðnispúkarnir eru þó ekki illgjarnir, heldur fremur klaufalegir en vilja vel. Bækurnar eru mjög mikið myndskreyttar og myndirnar eru í lit. Inn á milli fer frásagnarmátinn yfir í myndasöguform, sem gerir flettingar enn hraðari hjá lesara og tilfinningunni fyrir árangri enn meiri. Bækurnar þroska bæði myndlæsi og læsi. En það besta af öllu er að þær eru fljótlesnar, fyndnar og skemmtilegar. Þær gefa krökkum sem eru búin að ná nokkuð góðum tökum á lestrinum tækifæri til að fyllast stolti yfir að hafa klárað heila bók á skömmum tíma. Og ekki þunna kilju, heldur harða bók!


Vera til vandræða

Í bókunum um Veru eru þrjár sögur í einni bók. Vera heitir Veróníka, en er kölluð Vera af pabba sínum sem bætir við “til vandræða”. Það er þó ekki henni að kenna að hún lendi í vandræðum, hún er bara segull á vandræði!


ÞÍN EIGIN SAGA – LÉTTLESTRARBÆKURNAR

Ævar Þór skrifaði styttri útgáfur af Þín eigin bókunum og eru Þín eigin saga: Léttlestrarbækur nú þegar orðnar fjórar. Eins og í hinum lengri Þín eigin bókum þá þarf lesandinn að ákveða hvaða leið hann ætlar að velja í gegnum bókina. Í fyrstu bókinni fer lesandinn í ævintýri með Búkollu, þeirri næstu gætir hann þriggja barna Loka, í þriðju gengur lesandinn fram á piparkökuhús og í þeirri fjórðu fram á draugahús. Bækurnar eru fullar af húmor og hryllingi og listilega myndskreyttar af Evönu Kisu.


Handbók fyrir ofurhetjur

Bækurnar um Lísu slógu í gegn hjá krökkum á aldrinum 6-12 ára. Bækurnar segja frá Lísu sem er lögð í einelti. Hún kemst yfir rauða bók sem veitir henni ofurkrafta. Bækurnar eru mjög mikið myndskreyttar og í teiknimyndasöguformi. Nú þegar hafa komið út fjórar bækur um ofurhetjuna Lísu og Lestrarklefinn veit ekki betur en að fleiri séu væntanlegar.


Svarta Kisa

Bækurnar um Svörtu kisu eru bráðskemmtilegar, mikið myndskreyttar og á svipuðu erfiðleikastigi og bækurnar um Stjána og Stríðnispúkana. Bækurnar fjalla um Svörtu kisu sem kemst oftar en ekki í skemmtileg ævintýri og undarlegar aðstæður. Til eru fjórar bækur á íslensku um Svörtu kisu.


Hulda Vala dýravinur

Hulda Vala lendir í ævintýrum og kynnist oftar en ekki einhverjum dýrum í leiðinni, enda mikill dýravinur. Bækurnar eru með stórum stöfum og höfða sennilega frekar til stelpna fremur en stráka. Nú þegar eru komnar út átta bækur um Huldu Völu svo ef þitt barn dettur í bækurnar um Huldu Völu þá ætti úrvalið að vera nokkuð gott næstu vikurnar.


Nanna norn

Nanna norn býr í svörtu húsi í skóginum. Húsið er svart að utan og svart að innan, gólfteppin eru svört, stólarnir svartir og meira að segja baðkarið er svart. Auðvitað er kötturinn hennar kolbikasvartur líka og þess vegna verður hann alveg ósýnilegur þegar hann lokar grænu augunum. Þetta bakar tóm vandræði og þá er eins gott að Nanna kann að galdra!


SKÚLI SKELFIR

Sögurnar af Skúla Skelfi eru einfaldar og krakkar þekkja Skúla sum hver af sjánum, sem getur stundum auðveldað foreldrum að skapa áhuga fyrir bókinni. Skúli lendir í vandræðum sem oftast má rekja til hans eigin hvatvísi, frekjugangs eða óþekktar. Skúli er nefnilega svolítill hrotti stundum. En stundum er hann bara óskaplega misskilinn. Til eru tveir flokkar af Skúla Skelfis bókum: Létt að lesa Skúli Skelfir og Skúli Skelfir.


LJÓSASERÍAN

Það hafa safnast margar vandaðar íslenskar léttlestrarbækur í safn Ljósaseríunnar. Nú þegar hefur verið fjallað um nokkrar þeirra á Lestrarklefanum: Hundurinn með hattinnTinnu trítlimúsKorkusögurFleiri Korkusögur og Afi sterki og skrímslin í KleifarvatniBækurnar eru sniðnar að yngri lesendum – með góðu línubili, stórum stöfum og stuttum málsgreinum.


Óliver Máni

Óliver Máni er töfrastrákur. Hann á þó ekki alltaf sjö dagana sæla, líkt og kollegar hans hér í mannaheimum og mörg vandamálin sem hann þarf að eiga við eiga sér hliðstæður í okkar heimi. Hjá honum er þó meira af körtuvörtum og töfrasprotum. Sögurnar gerast flestar í skóla Ólivers og því nokkurs konar skólasögur, þótt skólinn sé í öðrum heimi. Það má líka færa rök fyrir því að bækurnar um Óliver Mána séu fyrstu skrefin í átt að því að lesa Harry Potter.


Langelstur bækurnar

Bækurnar um Eyju og Rögnvald eru geysivinsælar hjá krökkum á fyrstu árum grunnskóla. Eyja er einlæg persóna og Rögnvaldur, hennar aldni vinur, getur fært krökkum nýja sýn á eldra fólk. Bækurnar eru skrifaðar á léttu tungumáli, um heim sem allir krakkar þekkja vel – skólann. Þó er sú breyting á í þessum bókum að Rögnvaldur er 96 ára í fyrstu bókinni, 97 ára í annarri og hann verður 98 ára í þriðju og síðustu bókinni sem kemur út núna fyrir jólin.


Ropandi Rúna

Ropandi Rúna er sagan af Rúnu sem getur ropað rosalega hátt, svo hátt raunar að hún getur feykt hlutum um koll. Svo verður hún fræg fyrir ropann! Bókin er skrifuð á einföldu máli, með stórum stöfum og mjög mikið myndskreytt. Það er örugglega fullt af börnum þarna úti sem vilja gjarnan lesa um eitthvað eins skoplegt og rop!


Spæjarastofa Lalla og Maju 

Lalli og Maja hafa þegar leyst sex gátur á íslensku: Bakarísráðgátuna, Hótelráðgátuna, Sirkusráðgátuna, Demantaráðgátuna, Múmíuráðgátuna og Bíóráðgátuna. “Lalli og Maja eru forvitnir og klárir krakkar sem elska góðar ráðgátur og í stað þess að láta sér leiðast í skólafríum hafa þau stofnað spæjarastofu sem sérhæfir sig í að leysa glæpamál og furðulegar ráðgátur. Letrið er stórt, myndirnar eftir Willis er flottar og litríkar og bækurnar eru mátulega langar fyrir yngri lesendur sem eru að byrja að fóta sig í lestrinum. Bækurnar eru ágætlega skrifaðar en höfundar falla ekki í þá gryfju að skrifa of barnalegan texta og gera þar með lítið úr lesandanum,” sagði Lilja um bækurnar í umsögn um Múmíuráðgátuna.


Ristastóri krókódíllinn

Bók sem er létt í lestri eftir sagnameistarann Roald Dahl. Hver veit nema sagan af krókódílnum gæti verið fyrsta skrefið í átt að fleiri bókum eftir Roald Dahl. Risastóri krókódíllinn vill bara borða börn, jafnvel þótt hin dýrin reyni að fá hann ofan af því. “Risastóri krókódíllinn er skrifaður fyrir yngri börn en til dæmis Matthildur og Nornirnar. Sagan kom fyrst út árið 1978 í Bretlandi. Hún er einföld, fyndin en þó örlítið ógnvekjandi – og allt endar auðvitað vel. Það er stutt í húmorinn í textanum og verður auðvelt að fá krakka til að skella upp úr við lesturinn.”


Seiðfólkið

Fjögurra bóka serían um Seiðfólkið stoppar stutt við á skólabókasöfnum. Sögurnar segja frá þremur vinum, Arel, Enós og Sól sem alast upp við mismunandi aðstæður en eru samt bestu vinir. Höfundar bókanna Jo Salmson og Natalia Batista hlutu Norrænu barnabókaverðlaunin fyrir bókaflokkinn. Bækurnar henta einstaklega vel krökkum sem hafa áhuga á spennu og yfirnáttúrulegum hlutum í lesefni sínu.


HULDUHEIMAR

Nú þegar hafa komið út átta bækur um Hulduheima. Bækurnar segja frá Evu, Sólrúnu og Jasmín sem hafa verið bestu vinkonur síðan þær byrjuðu í skóla. Dag einn finna þær dularfulla öskju sem færir þær í hina töfrandi Hulduheima, þar sem Naðra drottning reyndir með göldrum og slægð að koma höggi á Teit konung og hirð hans. Vinkonurnar lenda í hverju ævintýrinu á eftir öðru.


Kepler62

Alls verða sögurnar um Jonna, Ara og Maríu sex og nú þegar eru fimm þeirra komnar út í íslenskri þýðingu. Fyrir krakka sem hafa áhuga á geimferðum, geimnum, vísindum og einhverju dularfullu þá eru þetta réttu bækurnar. “Í fjarlægri framtíð hafa mennirnir gengið duglega á allar auðlindir jarðar. Allt er komið í þrot og mannkynið berst í bökkum og yfir hangir þrúgandi nærvera hinnar sameiginlegu Ríkisstjónar. Tölvuleikur sem á að vera ósigrandi gengur á milli barna. Bræðurnir Ari og Jonni komast yfir leikinn, sigra hann og þá upphefst dularfull atburðarrás sem endar í Area 51 í Bandaríkjunum. Þeir stefna til sólkerfisins Kepler62 ásamt fleiri börnum sem síðasta von mannskyns.”


 

Það er ekki auðvelt að finna bók að lesa fyrir óviljuga lesara, en vonandi mun einhver af þessum bókum vekja upp áhugann á lestrinum svo ekki verði aftur snúið. Hafa ber í huga að það er mikil sigurtilfinning sem fylgir því að lesa heila bók spjaldanna á milli og oft eykst sú tilfinning sé bókin bundin inn í harðspjalda kápu. Það er eitthvað meira fullorðins að lesa harðspjaldabók, finnst þeim.

Listinn er unnin í samstarfi við Ingibjörgu Ösp Júlíusdóttur, bókavörð á Bókasafni Akraness.

Hits: 256