BRÚNN VOLVO
Eftir Stefaníu dóttur Páls
við geystumst áfram á gömlum Laplander
sætin voru hrjúf eins og gæran af kind
eða eldhúsbekkurinn hennar ömmu
þú sperrtir dúk yfir stálgrind
hver þarf stálboddí og bílbelti
þegar við höfum hvort annað?
við geystumst soft-top
ég togaði í lausan spotta á peysunni
meðan ég hugsaði um hendurnar
sem prjónuðu hana á mig
ég strauk steini
og lagði spilin mín á borðið
[hr gap=“30″]
Stefanía vill helst ekki gera neitt annað en að skrifa bækur, fíflast og búa til tónlist. En vegna þess að stundum þarf hún að borga reikningana sína (sem er því miður í hverjum mánuði, svona hér um bil) þá er hún líka í tveimur fullorðinsvinnum meðfram því að stunda nám í tónsmíðum við Listaháskólann. Fyrsta ljóðabók hennar, sem er samt meira svona eins og mynd-(h)l(eik/jóð)verk, kemur út hjá Blekfjelaginu 22. október næstkomandi.
