Áfengi, kynlíf og stormasamt ástarsamband

Fíkn eftir Rannveigu Borg Sigurðardóttur hefur fengið gott umtal bæði meðal bókaunnenda og hlustenda á Storytel. Ég ákvað að hlusta á hljóðbókina og skrifa því þennan dóm út frá henni. Lesarar voru Birna Pétursdóttir og Haraldur Ari Stefánsson. Sögur útgáfa gefur út.

Snarpur frásagnarstíll

Bókin fjallar um stormasamt og munúðarfullt samband Ellerts og Freyju Negroni. Frá fyrstu kynnum laðast þau að hvort öðru og dragast inn í veröld þar sem kynlíf, þráhyggja og fíkn ráða ríkjum. Þau lifa frekar ólíku lífi; Ellert er með níu til fimm vinnu, hittir félagana reglulega og finnst gaman að taka ljósmyndir. Hin dularfulla Freyja er hins vegar myndlistakona sem lærði á Ítalíu og öll frjálslegri og ævintýragjarnari. Sjónarhornið í bókinni skiptist oft og hratt á milli Ellerts og Freyju en einnig koma inn önnur sjónarhorn, meðal annars vinar Ellerts, móður hans og móður hennar. Þessi frásagnastíll gerir bókina snarpa þó að stundum valdi þetta því að sumt í atburðarrásinni er endurtekið óþarflega oft, í gegnum sjónarhorn mismunandi persóna.

Ástar-, áfengis- og kynlífsfíkn

Aðalumfjöllunarefni bókarinnar er ástin og fíknin. Freyja er haldin áfengisfíkn en Ellert myndi ég segja sé ástarfíkill, allavega Freyjufíkill. Hann sér ekki sólina fyrir henni, hún er svo heit, djúp og frábrugðin öllum þeim konum sem hann hefur áður kynnst. Síðan er það kynlífsfíknin en þau Ellert og Freyja fara ósjaldan til rekkju eða þá bara gera það standandi á þeim stað sem þau eru á þá stundina.

Stundum er of mikið sagt hreint út í bókinni, lesandinn er mataður af ástandi og tilfinningum persónanna. Þá er sérstaklega mikil greining á ástandi Freyju og alkóhólisma í seinni hluta bókarinnar í stað þess að sýna og treysta lesandanum til að komast að sömu niðurstöðu varðandi þennan fíknisjúkdóm.

Misræmi í lífssýn

Yfir heildina hefði mátt vinna aðeins betur í textanum sjálfum en sagan af Freyju og Ellert heldur lesandanum við efnið. Hvert mun þetta óheilbrigða samband leiða þau? Lesandinn getur ekki treyst frásögn Freyju né Ellerts þar sem hann er alltaf að fá mismunandi hliðar og sér hlutina með augum þeirra beggja. Þannig skapast samlíðan með báðum persónum á sama tíma og auðvelt er að efast um þær vegna misræmis í lífssýn þeirra. Einnig er áhugavert að sjá hversu ólíkar hugsanir þeirra eru, þau eru algjörlega svart og hvítt og halda ekki uppi sömu siðferðislegu gildum.

Fíkn er snörp, grípandi og ögrandi skáldsaga sem margir ættu að hafa gaman af. Það hefði þó mátt kafa dýpra ofan í textann og slípa frásögnina örlítið betur.

Lestu þetta næst

Júlían er fullkominn

Júlían er fullkominn

Aumingja Efia er bara átta ára og stjúpmamma hennar pínir hana til að lesa með sér barnabækur til...

Gratíana fullorðnast

Gratíana fullorðnast

Benný Sif Ísleifsdóttir stimplaði sig rækilega inn á rithöfundasenuna á Íslandi við útgáfu fyrstu...

Héragerði yfir páskana

Héragerði yfir páskana

Lóa Hlín Hjálmtýsdóttir er líklega best þekkt fyrir bráðfyndnar og beint-í-mark myndasögur. Til...

Systkinin í Rumpuskógi

Systkinin í Rumpuskógi

Systkinin Teddi og Nanna eru ákaflega samheldin refasystkin og búa saman í Stóru borg, þar sem öll...

Edinborg í aðalhlutverki

Edinborg í aðalhlutverki

Nú er farið að líða að aðventunni og því tilvalið að taka því rólega, búa sér til heitt súkkulaði...