„Penelópa gegnir afar mikilvægu starfi,“ segir á fyrstu síðu nýútkominnar barnabókar, Penelópa bjargar prinsi, frá Bókabeitunni. „Hún er prinsessa.“
Á næstu síðum lærum við um skyldur Penelópu, en hún sækir meðal annars fundi og bjargar hundum, kyssir ungabörn og berst við dreka. En á kvöldin, áður en Penelópa fer að sofa, les pabbi hennar fyrir hana ævintýrið um prinsinn í kistunni. Prinsinn sem hefur legið hulinn glerhjúp á fjallstindi í hundrað ár. Hin ævintýragjarna og réttsýna Penelópa ákveður að eina vitið sé að leggja í langferð og bjarga aumingja prinsinum, pakkar sér nesti og heldur út í heiminn.
Á ferðalagi sínu til að bjarga prinsinum ónefnda hittir hún alls kyns fólk og furðuverur, og nær alltaf að snúa sig út úr vanda sem hefur verið ófáum prinsessum fyrr á öldum fjötur um fót. Hún til dæmis þiggur ekki mat frá ókunnugum (hún er með nesti), hún þvertekur fyrir að fara að vinna sem húshjálp hjá sjö lötum bræðrum og neitar bónorði, enda er hún bara barn.
Hún lítur út eins og ég
Ég las bókina með Efiu, átta ára stjúpdóttur minni, enda algjör vitleysa að ætla að dæma barnabækur án þess að prófa verkið á alvöru barni. Við opnuðum bókina og á fyrstu síðu er falleg og litrík mynd af Penelópu prinsessu að horfa yfir ríki sitt. Hún er í bleikum prinsessukjól og auðvitað með kórónu, en það sem greip athygli Efiu var brún húð prinsessunnar og dökkar krullurnar sem streyma niður bak hennar. „Er þetta ég?“ spurði Efia kampakát. Ég sagði henni að nei, þetta væri Penelópa prinsessa, en Efia lét það ekki stoppa sig. „Hún lítur út eins og ég!“ Já, það gerir hún svo sannarlega.
Þetta er í annað skiptið sem við Efia finnum góða birtingarmynd af lítilli stelpu sem lítur út eins og hún í barnaefni. Hina bókina myndskreytti ég sjálf. Það þýðir ekki að það sé ekki hægt að finna svartar prinsessur eða stelpur í almennu afþreyingarefni fyrir börn, en það er erfitt. Því það er ekki nóg með að Efia vilji sjá sjálfa sig í bókum, hún vill líka hafa ánægju af lestrinum. Hvítir krakkar eiga auðveldara með að sjá sig í sínu uppáhalds efni því úrvalið er svo gríðarlegt, sérstaklega hér á landi þar sem höfundar og þýðendur gleyma oft að fagna fjölbreytileikanum sem Ísland býr yfir.
Beint í mark
Penelópa sló þess vegna algjörlega í gegn, en bókin er full af fallegum myndum af Penelópu, vel skrifuð og mjög fyndin. Efia hló upphátt (og ég líka) og þurfti að lesa nokkrar síður aftur oftar en einu sinni. Penelópa prinsessa er líka klár og ákveðin, hún er gerandi í eigin sögu og bókin snýr alls kyns ævintýra- og Disney klisjum beint á haus, Efiu til mikillar ánægju. Auk þessa eru aukapersónur bókarinnar alls konar, Penelópa er ekki eina brúna andlitið í hafsjó hvítra.
Bókin er harðspjalda, í A4 broti og dásamlega fallega myndlýst með litríkum myndum af Penelópu og ævintýrum hennar. Ég veit ekki fyrir hvaða aldur hún er hugsuð en hún virkar í það minnst mjög vel fyrir átta ára börn sem elska prinsessur, Disney og alls konar ævintýri. Sjö mánaða sonur minn var ekki jafn hrifinn, hann reyndi að sleikja bókina aðeins og snéri sér svo aftur að því að naga sitt uppáhalds skáldverk, Ljónsa eftir Birgittu Haukdal.
Lestu meira
Smáar sögur, stór orð
Smásagan: skáldverk sem hægt er að lesa í einum rykk, við einn kaffibolla, í einni strætóferð, á meðan barnið tekur lúrinn sinn, á styttri tíma en það tekur að skrolla í gegnum alla vinina á Instagram. Skáldverk sem er þröngum skorðum sett, en þegar vel er gert getur...
Birtingarmyndir og ævintýri
Úlfur hefur lengi hlakkað til að fara í ævintýraferð með bestu vinkonu sinni Ylfu. Ævintýradagurinn er uppfullur af háska og spennu og svo má ekki gleyma öllu namminu! Úlfur hlakkar mjög mikið til að segja mömmum sínum frá öllum ævintýrunum að degi loknum. Úlfur og...
Birtingarmyndir og ævintýri
Úlfur hefur lengi hlakkað til að fara í ævintýraferð með bestu vinkonu sinni Ylfu. Ævintýradagurinn er uppfullur af háska og spennu og svo má ekki gleyma öllu namminu! Úlfur hlakkar mjög mikið til að segja mömmum sínum frá öllum ævintýrunum að degi loknum. Úlfur og...
Þegar mannkynið verður ódauðlegt
Fyrir fjöldamörgum mánuðum var mælt með bók við mig. Reyndar seríu. Ég var á höttunum eftir einhverju auðlesnu og grípandi. Eitthvað sem ég gæti sökkt mér niður í og fengi mig til að gleyma umheiminum. Þessi sería átti að uppfylla það, sagði sá sem bjó á bak við...
